Alex Ieong
澳門極客之前懶咗咁耐唔出文，其實都係因為澳門冇乜好吹我地懶，不過！今日要觸動到我出文，原因？真係覺得澳門 IT 真係好無出色有特色！
2016年4月30日下午，五一黃金周前夕，澳門各出入境口岸故意隊冧電腦系統，終於成功令口岸出現人潮，大陸到澳門嘅旅客可以由入關開始就感受到比平時更濃的人味，全程人手服務，再唔會有冷冰冰嘅電腦系統將旅客與澳門海關人員隔開，真係好滾動！
不過，單係對國內同胞咁nice，澳門人就算幾大方都係會妒忌的！所以，澳門通與西洋街都為大家準備好歡渡黃金周嘅大禮：
喂！黃色小鴨喎！作為澳門第一個電子支付，澳門第一電商，可以賣到自家製的澳門特產黃色小鴨澳門通，澳門人一定想私藏返一套啦！於是，澳門極客駐澳門特派員決定出手，同大家一齊睇下到底澳門第三方支付同網購有幾威威！
咦？點解澳門西洋街，係…. 簡體字嘅？立即购买！
哦，要登录要注冊，好正常丫，填下手机号同密码先… 咦喂，好似怪怪的？
俾３秒鐘大家諗下，呢個畫面有咩唔妥？
3…
2…
1…
原來，打密碼嗰啲咁兒戲嘅嘢，係唔需要 https 加密連線架！加密咗，無人知道你個密碼，咁邊個可以代你管理呢？澳門極客呢啲懶巴閉嘅劣質網頁，學埋曬啲谷歌、面書呢啲外國勢力咁行 https 加密連線，擺明就係唔相信無私嘅人民、唔相信偉大嘅政府！
喺明文傳輸底下，我地感受到澳門眾人注目嘅濃濃關心之情，填地址都份外有信心：
哦，唔填區域，明白曬．．．
乜咁既？
得！我明！我唔應該死充！俾錢啦，好心急！
點呀，咁煩嘅？咁支付宝囉．．．
而家想點呀，澳門人唔係中國人呀？用 M+ Pay 囉．．．
快啲攞部手機出嚟 Download 先！
AppStore 呢啲咁落後嘅科技，要5月31日先發佈？啲黃鴨到時都變曬臘鴨啦！唯有完全信任 M+ Pay ．．．
小朋友，平時看到這個畫面千萬不要學哦！很多很多 iOS 的惡意軟件就是這樣裝進去的~~ 但本著澳門極客精神，本人不惜以身犯險一定要相信 M+！
掘頭路咗．．．最後都唔知點先俾到錢。（淚奔／已經唔記得點解要嚟買嘢）
唯有返轉頭，睇下 M+ Pay 有幾威威：
點改密碼好呢？Chrome 呢啲咁劣質嘅瀏覽器，唔支持好正常丫～去手機先….
其實… iOS 呢啲咁劣質嘅瀏覽器，按極都冇反應，都好正常丫！睇下西洋街：
唔，有西洋街獨有嘅科技加持，加密連線根本冇必要，帐户一樣好安全！
我走先啦！
買嘢？買咩呀？搞咁耐，都唔記得自己要買咩啦！下次見！