我講任天堂

曾幾何時,客廳部電視,係新聞黨、煲劇黨與打機黨之間硝煙四起的戰場,從來唔會講包容,但竟然日本有個特派員可以令新聞黨笑住望實煲劇黨做瑜珈,打機黨仲可以聯同外部勢力一齊與新聞黨煲劇黨開心大亂鬥,係囉,佢就係 Wii。

客廳嗰部電視,一直都係好鬼多嘢輪番拮上去:以前最濫有碟機、現時最爛係電視盒、宅宅最愛遊戲主機、還有小眾HTPC,但係如果要票選一家大細都鍾意,仲要拉埋朋友仔嚟尋開心,大概任天堂歷代有機會係票王。

不過,那動人時光,不用常回看。任天堂畢竟係日本公司,唔係單指根植日本嗰種日本公司,而係日本文化入曬血嘅公司,好聽叫擇善固執,難聽叫托杉都唔識轉膊。科技界,慢一日都嫌多,幾年唔生性病母倍感失望,真係無異於自殺;於是,想輕輕鬆鬆樂融融咁玩,就唯有轉曬去手遊;而客廳嗰部電視,亦已由百花齊放主戰場變成間中開放的私人影院,行文之此,黯然淚下。(謎之聲:濫情咗啲喎!

新一代 Apple TV 4 有得煲劇睇戲,有得打機,似乎有潛力將客廳嗰部電視重拾往日光輝,即管隨想一下:

  • Apple 將大量 iOS 遊戲開發商由手機帶至電視, 特別係輕鬆簡單老少咸宜嘅遊戲,其實同任天堂個目標差唔多;
  • Wii 都有唔少 downloadable 的 “App”,一格一格咁裝上去;而 Apple TV 一開始個 look 就已經同佢有異曲同工之妙;
  • 你話個 Siri Remote 打橫打直各有操控,配埋條手繩唔係向 Wii Remote 致敬,我打死都唔信;
  • 早幾年諗 Wii Fit ,今時今日講 Health Kit;
  • 「既然你地兩個咁夾,不如結婚啦!」
  • 以 Apple 的品牌、產能、習慣網上俾錢買嘢既巨大客戶群,加上 Nintendo 對輕遊戲嘅專注與一系列全人類都識的獨佔遊戲角色,生個仔出嚟真係唔講得笑;
  • 不過,雖然全人類都睇好呢門婚事,但係任天堂子個老爸真係好傳統,即使 iPhone 已經成為日本國民機,都唔會俾任天堂子委身於蘋果;
  • 至於蘋果會唔會霸王強上弓?以蘋果今時今日既氣魄,唔會做唔到,至於肯唔肯做,又係另一回事;
  • 當蘋果會因為 Beats 有串流音樂加死忠粉絲而買起佢,以便進軍串流音樂與音響外設,今時今日買起任天堂進軍客廳輕遊戲,又似乎不是夢;
  • 買咗任天堂會令其它遊戲廠難做?唔係丫,就算買咗 Beats,你咪一樣唔會買 Beats 耳機;就算 Microsoft 有自己開發 Xbox 遊戲,其它廠一樣都活得好好的;
  • 唔……

都係算把啦,埋個時間囊,睇下日後講唔講得中。

Facebook 留言

則留言